Në fshatin Lin të Pogradecit u zhvillua një aksion i gjerë pastrimi në kuadër të Ditës së Pastrimit, të shpallur nga qeveria, duke angazhuar një sërë institucionesh dhe strukturash vendore e qendrore.
Në këtë nismë morën pjesë Prefektura, Bashkia Pogradec, Forcat e Armatosura, punonjës të ndërmarrjeve të shërbimeve publike, administrata si dhe nxënës të shkollës së Linit. Aksioni u përqendrua kryesisht përgjatë vijës liqenore dhe në shtigjet turistike të zonës, me synim përmirësimin e pastërtisë dhe ruajtjen e një prej destinacioneve më tërheqëse turistike në rajon.
Prefektja Florina Zegullaj vlerësoi punën e deritanishme të kryebashkiakut Ilir Xhakolli, duke theksuar se aksione të tilla kanë jo vetëm ndikim konkret në terren, por edhe shërbejnë si një mesazh ndërgjegjësimi për qytetarët që të shmangin hedhjen e pakontrolluar të mbetjeve.
Ndërkohë, edhe drejtuesja e arsimit Vinjola Rota vuri në dukje rëndësinë e përfshirjes së nxënësve në aktivitete të tilla, si një mënyrë për të edukuar brezin e ri me kulturën e mbrojtjes së mjedisit.
Ky aksion pritet të vijojë edhe në ditët në vazhdim, duke u shtrirë në zona të tjera dhe site me rëndësi turistike dhe kulturore në qark.
