Radhë të gjata dhe pritje prej disa orësh janë krijuar në tokën neutrale në Pika e Kalimit Kufitar Kapshticë, si edhe në territorin grek, ku qindra drejtues mjetesh po presin për të hyrë në Shqipëri.
Sipas burimeve, shkak i situatës është bërë rënia e sistemit Entry/Exit System (EES), i përdorur nga autoritetet greke për menaxhimin e hyrje-daljeve në zonën Shengen.
Qytetarët shqiptarë raportojnë se kanë më shumë se dy orë në pritje për të kaluar kufirin, ndërsa shumë prej tyre janë emigrantë që jetojnë dhe punojnë në Greqi. Po ashtu, në radhë ndodhen edhe banorë të juglindjes që udhëtojnë drejt qyteteve kufitare për blerje ushqimore.
Ndërkohë, autoritetet shqiptare të kufirit kanë zhvilluar disa kontakte me homologët grekë për të gjetur një zgjidhje dhe për të normalizuar situatën. Pala shqiptare ka kërkuar që për shtetasit shqiptarë me dokumente greke të procedohet me përpunim manual, deri në rikthimin e sistemit në funksion.
