Juglindja e Shqipërisë vijon të mbetet një nga destinacionet më të preferuara për turistët e huaj, me shifra në rritje nga viti në vit. Sipas operatorëve turistikë, rreth 85% e vizitorëve që kanë zgjedhur Korçë dhe zonat përreth janë të huaj, duke e kthyer këtë rajon në një nga pikat më të forta të turizmit në vend.
Rritja e interesit lidhet edhe me bashkëpunimin e operatorëve vendas me agjenci turistike ndërkombëtare, çka ka sjellë një fluks të qëndrueshëm vizitorësh. Shumë prej turistëve tregojnë se e zbulojnë Korçën përmes internetit, ndërsa vlerësojnë veçanërisht ushqimin tradicional, çmimet e përballueshme, mikpritjen dhe mundësitë për turizëm të gjelbër.
Vizitorë nga vende të ndryshme europiane shprehen të impresionuar nga përvoja e tyre. Turistë nga Republika Çeke theksojnë se zona ofron natyrë të pasur malore dhe kosto të ulëta, ndërsa vizitorë të tjerë nënvizojnë mikpritjen dhe atmosferën miqësore. Një turiste nga Gjermani e cilëson Korçën si një qytet shumë të bukur, duke veçuar pazarin karakteristik dhe produktet lokale, si birra tradicionale.
Operatori turistik Klaus Pronjari tregon se rezervimet nga turistët e huaj kanë nisur që në vitin 2025, duke vijuar me ritme të larta edhe këtë vit. Sipas tij, Korça mbetet një destinacion me vlera historike dhe kulturore, që ofron gjithmonë diçka për t’u zbuluar.
Përveç Korçë, kërkesa e lartë për rezervime shtrihet edhe në Pogradec dhe në fshatrat turistikë si Tushemisht, Lin, Voskopojë dhe Dardhë. Ndryshe nga vitet e kaluara, këtë sezon ka interes në rritje edhe për zona më pak të eksploruara si Ersekë, si dhe fshatrat e bashkisë së Kolonjës, ndërsa lëvizje turistike po shënohet edhe në Devoll, Maliq dhe Pustec.
Me këtë trend në rritje, juglindja po konsolidohet si një destinacion turistik gjithëvjetor, duke ofruar kombinimin ideal të natyrës, traditës dhe mikpritjes shqiptare.
