Ambasadori i India në Tiranë, Ravindra Prasad Jaiswal, e konsideron Shqipërinë një vend ideal për punëtorët indianë, duke paralajmëruar rritje të numrit të tyre në vitet në vijim.
Në një deklaratë për mediat, ai bëri të ditur se aktualisht në Shqipëria janë rreth 1200 shtetas indianë të punësuar, ndërsa po punohet për një marrëveshje partneriteti me qeverinë shqiptare për të mundësuar migrim të rregullt dhe të organizuar të fuqisë punëtore.
Sipas ambasadorit, India disponon një numër të madh punëtorësh të kualifikuar, të cilët janë të shpërndarë në shumë vende të botës, përfshirë vendet e Gjirit, Mbretërinë e Bashkuar, Gjermaninë dhe Shtetet e Bashkuara të Amerikës. Ai theksoi se, ndonëse numri i tyre në Shqipëri mbetet ende i ulët, trendi është në rritje dhe pritet që gjithnjë e më shumë indianë të zgjedhin vendin tonë për të jetuar dhe punuar.
Ambasadori vuri në dukje se punëtorët indianë njihen për përkushtimin dhe aftësinë për t’u përshtatur lehtësisht me mjedisin lokal, duke i konsideruar një aset për tregun shqiptar të punës.
Rritje të ndjeshme po shënon edhe turizmi. Sipas tij, gjatë vitit 2024, mbi 30 deri në 35 mijë shtetas indianë kanë vizituar Shqipërinë, një shifër që pritet të rritet më tej këtë vit. Ai shtoi se vetëm në katër muajt e parë të vitit aktual, numri i turistëve indianë pothuajse është dyfishuar krahasuar me të njëjtën periudhë të një viti më parë.
Ndërkohë, interes ka edhe në fushën e investimeve. Sipas të dhënave nga Qendra Kombëtare e Biznesit, në Shqipëri janë të regjistruara rreth 18 kompani indiane, edhe pse jo të gjitha janë aktive. Ambasadori theksoi se do të duhet kohë që investimet të konkretizohen, por puna për promovimin e tyre ka nisur.
Në kuadër të 70-vjetorit të marrëdhënieve mes Shqipërisë dhe Indisë, pritet të organizohen aktivitete të ndryshme kulturore në vend, përfshirë ekspozita të lidhura me figurën e Nënë Tereza dhe mbrëmje kulturore indiane.
