Drejtoria Vendore e Policisë Korçë ka vijuar kontrollet dhe veprimet në disa zona të qarkut, duke arrestuar dhe proceduar disa shtetas për vepra të ndryshme penale.
Specialistët e Sektorit të Qarkullimit Rrugor arrestuan në flagrancë shtetasin E. A., 48 vjeç, banues në Korçë, i cili duke drejtuar automjetin në gjendje të dehur, ka përplasur katër automjete të parkuara në lagjet nr. 3 dhe 7. Pas ndalimit, testi i alkoolit rezultoi pozitiv.
Po ashtu, u arrestua në flagrancë shtetasi E. M., 31 vjeç, banues në Korçë, i kapur nga Forca e Posaçme “Shqiponja” duke drejtuar automjetin pa leje drejtimi.
Në Maliq, specialistët për Hetimin e Krimeve arrestuan shtetasin A. Sh., 25 vjeç, banues në fshatin Vashtëmi, i dyshuar për vjedhje në një dyqan në fshatin Vloçisht. Nga hetimet rezulton se ai dyshohet të jetë autor edhe i një vjedhjeje të mëparshme në një banesë në Vashtëmi, ku janë marrë pajisje elektroshtëpiake.
Gjithashtu, në Maliq nisi procedimi penal për shtetasin F. A., 33 vjeç, pasi dyshohet se ka goditur me grushte një 42-vjeçar.
Në Pogradec, policia referoi materialet në Prokurori për shtetasin R. B., 61 vjeç, banues në Tiranë, për vjedhje të energjisë elektrike, pasi gjatë kontrollit në subjektin e tij u konstatuan lidhje të paligjshme. Po ashtu, u procedua edhe shtetasi Xh. L., 61 vjeç, faturist i OSHEE, për shpërdorim detyre, pasi dyshohet se nuk ka kryer kontrollin e matësit të energjisë në këtë subjekt.
Ndërkohë, specialistët e Seksionit për Hetimin e Narkotikëve proceduan penalisht shtetasit E. F., 34 vjeç dhe R. F., 33 vjeç, banues në Korçë. Gjatë kontrollit në një lokal në lagjen nr. 14 u gjetën çipsa të dyshuar për lojëra fati, një grirëse për lëndë narkotike dhe një sasi e vogël kanabisi. Po ashtu, në celularin e njërit prej tyre u konstatuan faqe aktive për baste sportive.
Materialet procedurale janë referuar në Prokurorinë e Korçës për veprime të mëtejshme.
