Në Pogradec u zhvillua një takim rajonal i fokusuar në parandalimin e ekstremizmit të dhunshëm dhe radikalizmit në hapësirën online, me pjesëmarrjen e përfaqësuesve nga Shqipëria, Maqedonia e Veriut, si dhe institucione ndërkombëtare e lokale.
Në qendër të diskutimeve ishte nevoja për bashkëpunim ndërkufitar për të frenuar përhapjen e ekstremizmit dhe gjuhës së urrejtjes, veçanërisht asaj me karakter etnik dhe kulturor në rrjetet sociale. Përfaqësuesi i OSBE-së, Darko Angelov, theksoi se këto fenomene janë tashmë transnacionale dhe kërkojnë koordinim të vazhdueshëm mes vendeve.
Ai vlerësoi bashkëpunimin mes Shqipërisë dhe Maqedonisë së Veriut, duke nënvizuar se përfshirja e komuniteteve lokale, veçanërisht në zonat kufitare përreth Liqenit të Ohrit, është thelbësore për parandalimin e radikalizmit. Sipas tij, pavarësisht traditës së bashkëjetesës ndërfetare në rajon, ndikimi i fenomeneve globale kërkon vigjilencë të vazhdueshme.
Nga ana tjetër, përfaqësuesja e Qendrës së Koordinimit kundër Ekstremizmit të Dhunshëm pranë Ministrisë së Brendshme, Lejdi Dervishi, u shpreh se niveli i rrezikut për ekstremizëm të dhunshëm në Shqipëri mbetet i ulët, por gjuha e urrejtjes dhe dezinformimi në hapësirën online janë ende shqetësuese.
Ajo theksoi se propaganda dhe përmbajtjet dezinformuese në rrjetet sociale ndikojnë në rritjen e tensioneve dhe përkeqësimin e retorikës mes vendeve të rajonit. Në këtë kuadër, po punohet për forcimin e kuadrit ligjor me mbështetjen e Bashkimit Evropian, si dhe për promovimin e praktikave më të mira në bashkëpunim rajonal.
Autoritetet nënvizuan gjithashtu rëndësinë e përfshirjes së sistemit arsimor, komuniteteve lokale dhe strukturave të sigurisë në luftën kundër ekstremizmit. Vëmendje e veçantë i kushtohet grupeve vulnerabël, si të rinjtë dhe individët që ndikohen më lehtë nga përmbajtjet online.
Takimi përfundoi me thirrjen për më shumë bashkëpunim, dialog dhe krijimin e hapësirave të sigurta, si online ashtu edhe në komunitet, ku qytetarët mund të informohen dhe të shprehen lirshëm pa u ndikuar nga gjuha e urrejtjes.
