Shërbimet e Policisë në qarkun e Korçës vijojnë goditjen e paligjshmërisë në disa fusha, duke arrestuar dhe proceduar disa shtetas për vepra të ndryshme penale.
Shërbimet e Mbështetjes Operacionale të Hetimit në DVP Korçë kapën shtetasin N. Q., 44 vjeç, banues në fshatin Mborje, i shpallur në kërkim nga Drejtoria Vendore e Kufirit dhe Migracionit Korçë. Ai dyshohet se, në bashkëpunim me persona të tjerë, ka ndihmuar kundrejt pagesës 5 emigrantë për të kaluar kufirin në mënyrë të paligjshme. Emigrantët u kapën nga Policia më 14 mars 2026, në fshatin Polenë. Në përfundim të veprimeve, 44-vjeçari do të hetohet në gjendje të lirë për veprën penale “Ndihma për kalim të paligjshëm të kufijve”.
Ndërkohë, Specialistët e Seksionit për Hetimin e Krimeve Ekonomiko-Financiare referuan materialet në Prokurori për shtetasin L. L., 34 vjeç, banues në Pogradec, për veprën penale “Kontrabanda me mallra të tjera”. Ai u kap në aksin rrugor “Pogradec–Korçë”, pranë fshatit Vashtëmi, duke transportuar me automjet një sasi nafte të dyshuar si të kontrabanduar nga Maqedonia e Veriut. Automjeti dhe karburanti u sekuestruan si provë materiale.
Po ashtu, Specialistët për Hetimin e Krimeve në Komisariatin e Policisë Korçë nisën procedim penal ndaj shtetasit S. F., 33 vjeç, për prishje të qetësisë publike.
Në një tjetër rast, Specialistët e Komisariatit të Policisë Maliq referuan materialet për shtetasin Sh. B., 59 vjeç, banues në fshatin Kakaç, i dyshuar për dëmtimin e murit të një magazine në pronësi të një shtetasi tjetër.
Materialet procedurale janë referuar në Prokurorinë e Korçës për veprime të mëtejshme.
