Drejtoria Vendore e Policisë Korçë ka vijuar kontrollet dhe veprimet procedurale në disa zona të qarkut, duke goditur raste të shkeljeve të ligjit në qarkullimin rrugor, narkotikë dhe mashtrim.
Specialistët e Sektorit të Qarkullimit Rrugor arrestuan në flagrancë shtetasin E. A., 41 vjeç, banues në Korçë, pasi u kap në lagjen nr. 10 duke drejtuar automjetin në gjendje të dehur. Po ashtu, u referuan materialet në Prokurori për shtetasin M. D., 40 vjeç, i cili u kap në aksin rrugor “Korçë–Pogradec” duke drejtuar automjetin në gjendje të dehur.
Ndërkohë, Specialistët e Seksionit për Hetimin e Narkotikëve nisën procedim penal për shtetasin K. M., 28 vjeç, pasi në lagjen nr. 1, Korçë, gjatë kontrollit nga forcat “Shqiponja”, dyshohet se hodhi nga dritarja e automjetit një sasi të vogël lënde narkotike kanabis, e cila u sekuestrua si provë materiale.
Në Pogradec, Specialistët për Hetimin e Krimeve referuan materialet në Prokurori dhe shpallën në kërkim shtetasin F. S., 35 vjeç, rezident në Belgjikë. Ai dyshohet se ka mashtruar një 40-vjeçare duke i marrë para me pretendimin se do t’i investonte dhe do t’ia kthente shumëfish. Policia vijon punën për kapjen e tij.
Gjithashtu, më datë 8 prill 2026, në lagjen nr. 1, Pogradec, një 69-vjeçare nga fshati Starovë dyshohet se ka tentuar të vetëmbytet në liqen në gjendje të rënduar psikologjike, por është shpëtuar nga kalimtarë të rastit. Ajo mori ndihmën e parë në spital dhe më pas u largua në banesë.
Materialet procedurale janë referuar në Prokurorinë e Korçës për veprime të mëtejshme.
