Një grup qytetarësh nga Korça kanë ndërmarrë një iniciativë për t’i kërkuar qeverisë shqiptare të marrë përgjegjësi për trajtimin e fëmijëve dhe të rinjve nga mosha 0 deri në 18 vjeç, të cilët vuajnë nga sëmundje që nuk mund të trajtohen në Shqipëri.
Sipas iniciatorëve, në rastet kur sistemi shëndetësor vendas nuk ofron zgjidhje mjekësore, shteti duhet të garantojë financimin e kurimit jashtë vendit, duke mos lënë barrën ekonomike mbi familjet.
Një nga nismëtarët, Ardit Konomi, shprehet se ideja lindi pas një rasti të ndjeshëm në Korçë, ku një foshnjë e sëmurë rëndë detyroi familjarët të kërkonin ndihmë tek shoqatat dhe donatorët për të siguruar trajtimin jashtë vendit.
Ai thekson se kjo nuk duhet të jetë një zgjidhje e zakonshme, pasi bëhet fjalë për një fenomen të përsëritur. Sipas tij, nga një studim i kryer prej grupit, rezulton se çdo vit ka rreth 35-40 raste të fëmijëve që kanë nevojë për trajtim të specializuar jashtë Shqipërisë, ku 60-80% e tyre nuk mund të trajtohen brenda vendit. Rastet përfshijnë ndër të tjera radiokirurgji dhe sëmundje të rënda si leucemia akute.
Ndërkohë, një tjetër iniciator, Nardi Olli, thekson se kjo nismë synon të garantojë një të drejtë themelore kushtetuese: të drejtën për shëndetin dhe jetën.
Sipas tij, në shumë raste kur shteti nuk ka mundësi të ofrojë trajtim, pacientët dhe familjet e tyre mbeten pa mbështetje dhe në pamundësi për të siguruar shërbimin e nevojshëm. Për këtë arsye, nisma synon përmirësimin e kuadrit ligjor ekzistues, në mënyrë që qytetarët të mos mbeten “në mëshirë të fatit”, por të kenë mbështetje konkrete nga institucionet.
Nismëtarët bëjnë apel që kjo çështje të marrë vëmendjen e institucioneve përgjegjëse dhe të shqyrtohet krijimi i një mekanizmi të posaçëm shtetëror, i cili do të sigurojë financimin e kurimit jashtë vendit për fëmijët, në rastet kur kjo është e domosdoshme.
