Korça është kthyer në shtëpinë e re për një mjek italian, i cili ka vendosur të lërë Italinë dhe të vazhdojë jetën e tij në Shqipëri. Giancarlo Pevarello, okulist me shumë vite përvojë, thotë se erdhi fillimisht për të provuar diçka të re, por sot është i bindur se do të qëndrojë këtu.
Ai tregon se në Korçë ka gjetur raste të veçanta që nuk i kishte hasur shpesh më parë, ndërsa për të më e rëndësishme është që pacientët të shohin më mirë dhe të kenë shëndet.
“Për të provuar gjëra të reja, më pëlqeu ideja për të shkuar në një vend që gjithmonë ka qenë një pikë referimi sepse këtu gjej gjëra të reja. Ka shumë lloje përdese, ka situata delikate me fëmijët, kam gjetur edhe një rast me filateri, që është problem në brendësi të syrit, janë larva brenda në sy. Kam bredhur mjaft nëpër botë por në Shqipëri gjeta vendin perfekt për fushën time ”
Mjeku italian shprehet se është ndjerë i mirëpritur nga njerëzit dhe se tashmë ka krijuar miq dhe jetën e tij në këtë qytet.
” Po, do jetoj në Shqipëri. Njerëzit më pëlqejnë shumë, populli është komplet ndryshe nga italianët, këtu ka ende vlera. Jam plak tani, kam krijuar miq këtu dhe ka edhe italianë të tjerë në Korçë, dal me ta. Për mua Korça është si parajsa, ushqim i mirë, klimë e mirë, njerëz të mirë dhe çmime të mira ”
Madje ai ka edhe një mesazh për të rinjtë shqiptarë, duke thënë se Shqipëria është një vend me shumë mundësi dhe me të ardhme.
“Bëjnë gjënë më të gabuar të kësaj bote ata që ikin. Duhet të rrinë në Shqipëri sepse përveçse ka shumë nevojë, është edhe mundësia për të krijuar një të ardhme të mirë. Jo vetëm në mjekësi por në të gjitha fushat, sepse Shqipëria po zhvillohet. Ata që ikin mendojnë se diku tjetër është më mirë, por nuk është e vërtetë.”
Giancarlo Pevarello vazhdon të vizitojë pacientë në Korçë, ndërsa thotë se ka gjetur jo vetëm një vend pune, por edhe një vend që e ndjen si shtëpinë e tij të dytë.
