Rritja e çmimeve në qytetin e Korçës është kthyer në një shqetësim për shumë qytetarë dhe biznese, pasi ndikon drejtpërdrejt në jetesën e përditshme.
Që prej datës 4 mars, Prefekti i Qarkut Korçë është angazhuar institucionalisht në ndjekjen e kësaj situate, duke kërkuar angazhimin dhe ndërhyrjen e strukturave përgjegjëse në qark, si dhe kryerjen e kontrolleve për të garantuar zbatimin e ligjit dhe për të shmangur abuzimet në treg.
Sipas Prefekturës, qytetarët meritojnë një treg të drejtë dhe funksional, në përputhje me mekanizmat ligjorë që rregullojnë aktivitetin ekonomik.
Prefektura e Qarkut Korçë bën me dije se do të vijojë ta ndjekë nga afër këtë çështje dhe do të bashkëpunojë me institucionet përkatëse për të mbrojtur interesin e qytetarëve dhe për të garantuar respektimin e rregullave të tregut.
