Drejtoria Vendore e Policisë Korçë ka referuar disa materiale procedurale në Prokurori për vepra të ndryshme penale në territorin e qarkut.
Specialistët për Hetimin e Krimeve në Komisariatin e Policisë Korçë nisën procedim penal ndaj shtetasit S. Z., 66 vjeç, banues në Korçë, pasi në lagjen nr. 9 ka kundërshtuar punonjësen e Policisë Bashkiake dhe i ka dëmtuar bllokun e gjobave, në momentin që ajo po i vendoste masë administrative për parkim të gabuar. Ai gjithashtu ka kundërshtuar me forcë edhe drejtorin e Policisë Bashkiake, i cili ka ndërhyrë për të neutralizuar situatën.
Në Maliq, specialistët referuan materialet në Prokurori dhe shpallën në kërkim shtetasin O. A., 49 vjeç, banues në fshatin Libonik, pasi dyshohet se më 21 shkurt 2026 ka vjedhur një televizor në banesën e një shtetasi po në Libonik. Po punohet për kapjen e tij.
Po në Maliq, nisi procedimi penal për shtetasin Y. Zh., 37 vjeç, i dyshuar për dëmtimin e derës së qendrës shëndetësore, si dhe për shtetasin A. Sh., 31 vjeç, banues në fshatin Zëmblak, i cili dyshohet se është konfliktuar fizikisht me një shtetas tjetër për motive të dobëta.
Në Pogradec, u referuan materialet në Prokurori për shtetasin Xh. S., 48 vjeç, i dyshuar për vetëgjyqësi, pasi ka penguar vëllanë e tij të rrethojë një sipërfaqe trualli, për të cilën të dy kanë pretendime pronësie.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
Ndërkohë, më 23 shkurt 2026, një 65-vjeçar ka kallëzuar se në banesën e tij në lagjen nr. 4, Korçë, i mungonte një shumë parash. Po punohet për identifikimin dhe kapjen e autorit ose autorëve.
