Specialistët për Hetimin e Narkotikëve në Drejtoria Vendore e Policisë Korçë referuan materialet në Prokurori, ku nisi procedimi penal për shtetasit A. K., 41 vjeç, banues në fshatin Plasë, Maliq, dhe N. L., 21 vjeç, banues në Korçë. Gjatë kontrolleve fizike në fshatin Pendavinj, Maliq dhe në lagjen nr. 18, Korçë, atyre iu gjetën sasi të vogla lënde e dyshuar narkotike Cannabis Sativa.
Po ashtu, Specialistët e Seksionit për Hetimin e Krimeve Ekonomike dhe Financiare referuan materialet për shtetasen D. T., 38 vjeçe, banuese në Korçë, e cila u konstatua në lagjen nr. 8 duke ushtruar aktivitet tregtar (parukeri) pa e regjistruar në organet tatimore.
Nga Specialistët për Hetimin e Krimeve të Komisariatit të Policisë Korçë u referuan materialet për shtetasin R. A., 24 vjeç, banues në fshatin Kamenicë, pasi në lokalin në përdorim prej tij, gjatë kontrollit të 5 celularëve, u gjetën faqe për baste sportive. Në cilësinë e provës materiale u sekuestruan 5 celularët.
Gjithashtu, nisi procedimi penal për shtetasin E. V., 28 vjeç, banues në fshatin Buzaishtë, Pogradec, pasi gjatë kontrollit në automjetin e tij, në lagjen nr. 17, Korçë, iu gjetën dhe sekuestruan një mjet prerës (thikë) dhe një sasi e vogël municioni luftarak.
Ndërkohë, Specialistët për Hetimin e Krimeve të Komisariatit të Policisë Pogradec referuan materialet për veprën penale “Dhuna në familje” ndaj shtetasve R. L., 67 vjeç, V. L., 38 vjeç (babë e bir) dhe Z. L., 34 vjeçe, banues në fshatin Velçan, Pogradec. Sipas hetimeve paraprake, R. L. dhe V. L. dyshohet se kanë ushtruar dhunë fizike ndaj 34-vjeçares, e cila u pajis me urdhër mbrojtjeje. Gjithashtu, Z. L. dyshohet se ka ushtruar dhunë ndaj vjehrrit të saj.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
