Drejtoria Vendore e Policisë Korçë ka vijuar kontrollet në territor, duke evidentuar disa raste të shkeljeve të ligjit në qarkullimin rrugor dhe rendin publik.
Shërbimet e Sektorit të Qarkullimit Rrugor arrestuan në flagrancë dy shtetas:
I. M., 41 vjeç, banues në Ersekë, dhe K. H., 35 vjeç, banues në fshatin Menkulas, Devoll, pasi u kapën duke drejtuar automjetet në gjendje të dehur.
Po ashtu, u referuan materialet në Prokurori për shtetasit O. B., banues në Ersekë, dhe M. S., banues në fshatin Borovë, Kolonjë. Në aksin rrugor “Borovë–Ersekë”, automjeti që drejtohej nga O. B. është përplasur me një mjet bujqësor që drejtohej nga M. S., i cili rezultoi në gjendje të dehur. Të dy drejtuesit kryen kontrollet mjekësore në spital dhe më pas u larguan në banesat e tyre.
Ndërkohë, specialistët për Hetimin e Krimeve të Komisariatit të Policisë Korçë nisën procedim penal ndaj shtetasit G. E., 30 vjeç, banues në fshatin Floq, pasi në bulevardin “Republika” në Korçë është konfliktuar për motive të dobëta me shtetasin K. K., 25 vjeç, banues në fshatin Dvoran. Gjatë konfliktit, 30-vjeçari dyshohet se e ka kanosur me mjet prerës dhe i ka dëmtuar kabinën e automjetit, duke penguar përkohësisht qarkullimin dhe prishur qetësinë publike. Në cilësinë e provës materiale u sekuestrua mjeti prerës i dyshuar.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
