Prefektura e Qarkut Korçë bën me dije se, bazuar në raportimet nga të gjitha strukturat përgjegjëse, nuk ka asnjë shkollë të mbyllur dhe procesi mësimor vijon normalisht në të gjitha institucionet arsimore të qarkut, pavarësisht kushteve atmosferike.
Ndërkohë, sa i përket infrastrukturës rrugore rurale, Emergjencat Civile të Bashkisë Maliq raportojnë një problematikë në njësinë administrative Moglicë, ku si pasojë e shkarjes së dherave është bllokuar segmenti rrugor që lidh fshatrat Kodras, Peshtan dhe Protopapë.
Strukturat përgjegjëse të bashkisë ndodhen në terren dhe kanë nisur menjëherë punën për pastrimin e rrugës dhe rikthimin e qarkullimit normal, me qëllim garantimin e lëvizjes dhe sigurisë së banorëve të zonës.
Prefektura e Qarkut Korçë vijon monitorimin e situatës në kohë reale dhe mbetet në koordinim të vazhdueshëm me institucionet vendore, për të garantuar sigurinë, normalitetin dhe ndërhyrjen e shpejtë në çdo rast problematike në territor.
