Fshati turistik i Voskopojës ka qenë i mbushur me turistë gjatë kësaj fundjave, duke u kthyer në një nga destinacionet më të frekuentuara të juglindjes së vendit. Vizitorët kanë ardhur jo vetëm nga qytete të ndryshme të Shqipërisë, por edhe nga emigrantë që jetojnë prej vitesh në vende europiane, të cilët kanë zgjedhur Voskopojën për dëborën, bukurinë natyrore dhe qetësinë që ofron.
Përveç peizazhit dimëror, turistët janë tërhequr edhe nga mikpritja karakteristike e zonës dhe kuzhina tradicionale, që mbetet një nga pikat më të forta të këtij destinacioni.
Sipas operatorëve turistikë, që nga data 23 dhjetor e vitit të kaluar e deri këtë fundjavë, hotelet, bujtinat dhe shtëpitë pritëse kanë qenë të rezervuara në kapacitet të plotë, si nga turistë vendas ashtu edhe nga të huaj. Voskopoja ka mbi 800 vende akomodimi, çka e bën atë një nga zonat turistike më të përgatitura për të përballuar fluksin e vizitorëve gjatë sezonit dimëror.
