Drejtoria Vendore e Policisë Korçë ka referuar materiale në Prokurori për disa raste të veprave penale, të evidentuara nga shërbimet e komisariateve në territorin e qarkut.
Shërbimet e Komisariatit të Policisë Korçë nisën procedimin penal për shtetasin A. J., 28 vjeç, banues në Korçë, pasi gjatë kontrollit të celularit të tij, në ambientet e një lokali, u konstatuan faqe aktive për baste sportive.
Në Pogradec, u referuan materialet në Prokurori për shtetasin F. B., banues në këtë qytet, pasi dyshohet se është konfliktuar fizikisht me shtetasin H. S., për motive të dobëta.
Ndërkohë, Komisariati i Policisë Devoll nisi procedimin penal për shtetasin E. A., 43 vjeç, banues në Bilisht, për veprën penale “Falsifikimi i dokumenteve”. Sipas policisë, në muajin shtator 2025, ai dyshohet se ka falsifikuar dokumentet e automjetit të ish-bashkëshortes së tij të ndjerë, me qëllim kalimin e automjetit në pronësi të tij. Po nga ky komisariat u referuan materiale edhe për një 17-vjeçar, banues në Bilisht, të cilit gjatë kontrollit fizik iu gjet një mjet prerës (thikë), që u sekuestrua në cilësinë e provës materiale.
Nga Komisariati i Policisë Kolonjë u referuan materiale në Prokurori për shtetasin G. D., 50 vjeç, banues në Ersekë, pasi nuk iu bind urdhrit të punonjësve të Policisë për të paraqitur dokumentacionin e automjetit, në momentin që ishte ndaluar te vijat e bardha, në qytetin e Ersekës.
Po ashtu, më datë 15.12.2025, në fshatin Dardhë, familjarët konstatuan pa shenja jete në banesë shtetasen T. B., 90 vjeçe. Nga veprimet e para hetimore dyshohet se ajo ka humbur jetën për shkaqe natyrale.
Të gjitha materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
