Korçë – Shërbimet e Policisë së Qarkut Korçë kanë referuar disa materiale në Prokurori dhe kanë kryer veprime të menjëhershme lidhur me raste të ndryshme të evidentuara gjatë datës 11 dhjetor 2025.
Pogradec – Procedim penal për dhunë dhe transport të paligjshëm të lëndës drusore
Komisariati i Policisë Pogradec ka nisur procedimin penal për:
- M. H., 33 vjeç, banues në fshatin Alarup, pasi dyshohet se ka goditur me send të fortë shtetasin D. H.
- Xh. Ç., 26 vjeç, banues në fshatin Stropckë, i kapur duke transportuar me automjet një sasi drush zjarri pa dokumentacionin përkatës. Lënda drusore u sekuestrua në cilësinë e provës materiale.
Devoll – 78-vjeçari i humbur gjendet shëndoshë e mirë
Familjarët e T. L., 78 vjeç, banues në Bilisht, i cili vuan nga probleme të shëndetit mendor, kanë njoftuar Policinë për largimin e tij nga banesa.
Pas kërkimeve intensive nga shërbimet e Policisë së Devollit dhe të kufirit të gjelbër në Kapshticë, i moshuari u gjet në afërsi të fshatit Trestenik, në gjendje të mirë shëndetësore dhe iu dorëzua familjarëve.
Maliq – Humbet 89-vjeçari, vijojnë kërkimet
Në Komisariatin e Policisë Maliq është paraqitur shtetasja M. P., 59 vjeçe, nga fshati Vreshtas, e cila ka deklaruar se i ati, N. P., 89 vjeç, është larguar nga banesa dhe nuk është kthyer.
Shërbimet e Policisë janë angazhuar dhe vijojnë kërkimet për gjetjen e tij.
Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë.
