Në Pogradec u prezantua një nismë me rëndësi të veçantë për bujqësinë lokale, e cila synon të ruajë dhe zhvillojë varietetin e rrallë të rrushit “Serina e Bardhë”, një pasuri tradicionale e zonës që rrezikonte të zhdukej. Fermerët e Grabovicës janë bashkuar tashmë në një kooperativë, duke krijuar mundësi të reja për zhvillim ekonomik, investime të përbashkëta dhe rritje të produktivitetit.
Ersol Caco, prodhues vere, e cilësoi këtë bashkim si një hap jetik për të ardhmen e vreshtarisë në Pogradec
“Qëllimi kryesor është identifikimi i produkteve tipike lokale. Në vreshtarinë e zonës ka varietete shqiptare me rrisk të humbjes, si Serina e Bardhë, Gems dhe Muskat Kanellë. Ne si fermerë jemi bashkuar ligjërisht për të investuar në vreshta të rinj dhe për të pasur një mënyrë tjetër taksimi. Aktualisht jemi 7 fermerë dhe synojmë të përfshijmë të gjithë ata që merren me vreshtari.”
Gjatë ceremonisë së zhvilluar në Grabovicë, u dorëzuan edhe makineri moderne bujqësore për inkubatorin e Pogradecit, duke përmirësuar kushtet e punës dhe duke krijuar mbështetje konkrete për fermerët e zonës.
Kryetari i Bashkisë Pogradec, Ilir Xhakolli, vlerësoi modelin e bashkëpunimit mes fermerëve.
“Më në fund u kuptua se duke qenë bashkë përfitimet janë më të mëdha. Bashkimi sjell lehtësira, qoftë për taksat, qoftë për aksesin në skema mbështetëse. Kjo është dallëndyshja e parë që do të sjellë edhe kooperativa të tjera në fshatrat e Pogradecit. Edhe farërat, edhe pesticidet merren më lirë dhe më cilësore kur punoni të bashkuar.”
Nga ana tjetër, përfaqësuesi italian Paolo Viviani theksoi potencialin e madh që kanë produktet tradicionale shqiptare për të depërtuar në tregjet europiane.
“Produkti tradicional luan një rol të rëndësishëm në promovimin e aktiviteteve të fermerëve shqiptarë. Ne kemi identifikuar produktet që lidhen ngushtësisht me zonat e tyre dhe ato kanë vend të sigurt në tregun kombëtar. Kur arrijnë vlerë të veçantë ose sasi të mjaftueshme, hapet mundësia e tregut ndërkombëtar. Me ecjen që po bën Shqipëria drejt BE, tregu europian është një mundësi e shkëlqyer për këto produkte.”
Kjo nismë pritet të sjellë standarde të reja pune, teknologji moderne, trajnime dhe mbështetje profesionale për fermerët e Pogradecit, duke ruajtur identitetin rural dhe duke forcuar vlerën e produkteve vendase në tregun kombëtar dhe ndërkombëtar.
