Banorët e fshatrave të njësisë administrative Çlirim, në bashkinë Kolonjë, kanë protestuar sot në hyrje të urës së fshatit Qafëzez, e cila ka dalë plotësisht jashtë funksionit, duke izoluar banorët dhe duke bllokuar qarkullimin drejt aksit kombëtar Ersekë–Korçë.
Sipas banorëve, degradimi i urës është një problem i kahershëm, i lënë pas dore prej vitesh, ndërsa shirat e ditëve të fundit e kanë shembur totalisht, duke e bërë të pakalueshme si për automjetet, ashtu edhe për këmbësorët.
Banorët shprehen:
- “Para një jave ra një shi i papare, uji erdhi me vrull dhe ura u bastardua. Ka 4 vite që nuk është vënë dorë. Të 12 fshatrat e ish-komunës Çlirim janë të izoluara.”
- “Kjo urë ka shumë kohë kështu. Duhej riparuar nga bashkia, por për shkak të mungesës së punimeve, ra.”
- “Me makinë s’kalohet fare, edhe në këmbë mezi kalojmë. Jemi me blegtori e me barrë në krah.”
- “Kemi 10 ditë me frikë. Mallrat nuk i lëvizim dot, rruga është e bllokuar.”
- “Ka 25 fshatra të bllokuar, njerëzit nuk kalojnë dot. Nusja ime iku me djalin nga Psar i Zi.”
I kontaktuar nga media, nënprefekti i Kolonjës, Adriatik Braçe, bëri me dije se është përgatitur një projekt inxhinierik që do të sjellë një zgjidhje përfundimtare të problemit. Sipas tij, deri në realizimin e këtij projekti nuk përjashtohet mundësia e vendosjes së një ure të tipit Bel nga Forcat e Armatosura, për të rikthyer lëvizjen e banorëve.
Ura e Qafëzezit është pika kryesore lidhëse për 12 fshatra të njësisë Çlirim me qendrën administrative, duke e kthyer situatën aktuale në një emergjencë infrastrukturore për banorët e zonës.
