Një ngjarje historike u zhvillua së fundmi në Vatikan, ku Fortlumturia e Tij, Kryepiskopi i Tiranës, Durrësit dhe i Gjithë Shqipërisë, Imzot Joani, u takua me Shenjtërinë e Tij, Papa Leonin XIV. Takimi u realizua në kuadër të një audience private, pas pjesëmarrjes së Kryepiskopit në Takimin Ndërkombëtar “Osare la pace”, të organizuar nga Komuniteti i Sant’ Egidios në Romë.
Gjatë këtij takimi vëllazëror u diskutua për tema me interes të përbashkët, ku u theksua rëndësia e rivendosjes së paqes dhe ndalimit të luftrave që po prekin shumë rajone të botës. Një vëmendje e veçantë iu kushtua të rinjve, të cilët u cilësuan si e tashmja dhe e ardhmja e shoqërive bashkëkohore.
Kisha Orthodhokse Autoqefale e Shqipërisë vazhdon të dëshmojë angazhimin e saj për ndërtimin e marrëdhënieve miqësore e bashkëpunuese me të gjitha komunitetet fetare, duke kontribuar në forcimin e harmonisë dhe mirëqenies shoqërore.
Ky takim i rëndësishëm nënvizon përpjekjet e përbashkëta të të krishterëve për paqen dhe bashkëjetesën, ku Kisha Orthodhokse Autoqefale e Shqipërisë ka një rol thelbësor. Në përfundim të audiencës, të dy personalitetet shkëmbyen dhurata simbolike në shenjë respekti dhe miqësie.
