Pas disa viteve mbyllje, Qendra Rinore Korçë është gati të rihapë dyert, dhe drejtimin e saj do ta marrë një emër i njohur e i respektuar në komunitet – Dejvi Hoxha, 27-vjeçari energjik, komunikues dhe me një përvojë të gjerë në fushën e projekteve rinore, sociale dhe mediatike.
I lindur dhe rritur në Korçë, Dejvi është një nga të rinjtë që ka spikatur për angazhimin e tij të pandalshëm në dobi të komunitetit. Karrierën e nisi si gazetar dhe spiker në RTSH Korça, duke u bërë një zë i njohur për publikun vendas. Paralelisht, ai u aktivizua në disa prej organizatave humanitare dhe shoqatave rinore më aktive në qytet, duke marrë pjesë dhe duke udhëhequr nisma që kanë sjellë ndryshim konkret. Prej kohësh, ai mban edhe detyrën e Presidentit të Rotaract Club Korçë, ku ka ideuar dhe realizuar projekte me ndikim në fushën sociale, kulturore dhe arsimore.
Eksperienca e tij profesionale është e larmishme dhe e pasur: nga roli i Specialistit të Sigurisë së Cilësisë në Postën Shqiptare, ku mbulonte 42 zyra postare të qarkut, tek pjesëmarrja si Anëtar i Këshillit Bashkiak të Korçës për katër vite, ku kontribuoi në hartimin dhe mbështetjen e politikave për të rinjtë. Gjithashtu, Dejvi ka marrë pjesë në një sërë trajnimesh dhe certifikimesh prestigjioze në fusha si teknologjia, mediat sociale, dizajni grafik, menaxhimi i projekteve dhe lidershipi.
Me rikthimin e Qendrës Rinore, Dejvi ka një vizion të qartë: ta shndërrojë atë në një hapësirë të hapur për kreativitet, zhvillim personal dhe bashkëpunim, ku çdo i ri i qytetit të ndjejë se ka mundësinë të zhvillojë talentin e tij dhe të jetë pjesë e ndryshimit. Në planin e tij janë parashikuar aktivitete kulturore, trajnime profesionale, punëtori kreative dhe projekte bashkëpunuese me organizata brenda dhe jashtë vendit.
“Qendra Rinore nuk është thjesht një godinë, por një vatër e gjallë idesh dhe mundësish. Synimi im është që çdo i ri i Korçës ta ndjejë këtë vend si shtëpinë e tij të dytë,” – shprehet Dejvi Hoxha.
Me energjinë, vizionin dhe përkushtimin e tij, Dejvi pritet të sjellë një frymë të re në jetën rinore të Korçës, duke e bërë Qendrën një pikë referimi për të gjithë ata që besojnë se e ardhmja ndërtohet me ide, punë dhe bashkëpunim.
