Korça ka vite që përjeton një bum zhvillimi urban dhe turistik, por në të njëjtën kohë, ky zhvillim po ndodh pa një planifikim të mirëfilltë ekonomik dhe urban. Lejet e biznesit po jepen pa analizuar kërkesën reale të tregut apo nevojat e qytetarëve. Kushdo që dëshiron, ndërton një hotel, hap një berberhane apo restorant, pa pasur ndonjë analizë të mirëfilltë mbi mbipopullimin e tregut me të njëjtat lloje aktivitetesh.
Shifra që flasin vetë:
Sipas të dhënave zyrtare për vitet 2023-2024, në Korçë janë mbyllur mbi 500 biznese, ndërkohë që janë hapur rreth 420 të reja. Kjo tregon një rënie të bilancit ekonomik dhe një sinjal alarmi që tregu është i ngopur, dhe jo i orientuar drejt qëndrueshmërisë. Një pjesë e mirë e hoteleve po shiten, ndërsa berberhanet, restorantet dhe “fast food”-et po mbyllen pa arritur dot të mbijetojnë një vit të plotë.
Pse ndodh kjo?
Sepse Bashkia e Korçës nuk ka një strategji ekonomike të integruar, që të orientojë investimet private drejt sektorëve realisht të nevojshëm. Nuk ka një filtër për të analizuar nëse një lagje ka nevojë për një tjetër hotel, një tjetër berber apo një tjetër butik rrobash, kur në fakt ajo mund të ketë mungesë shërbimesh shëndetësore, laboratorësh analize, librarish apo biznese teknologjike.
Modeli i vendeve të zhvilluara:
Në vendet perëndimore, përpara se të jepet një leje biznesi, komunat dhe bashkitë zhvillojnë analiza tregu dhe demografike për të kuptuar nëse ka hapësirë reale për një biznes të ri. Për shembull, në qytetin Amsterdam, hapja e hoteleve të reja në qendër të qytetit është ndaluar, sepse u arrit në përfundimin se qyteti ka më shumë se mjaftueshëm njësi akomoduese. Po ashtu në Toronto, çdo lagje ka një plan ekonomik që përcakton llojet e bizneseve që mund të hapen për të ruajtur diversitetin dhe për të shmangur mbingopjen e tregut me të njëjtat shërbime.
Korça ka nevojë për një plan konkret:
Bashkia duhet të hartojë një Plan të Zhvillimit Ekonomik Vendor, ku të përcaktohet qartë:
çfarë lloj biznesesh ka nevojë çdo zonë e qytetit;
cilat janë sektorët e mbingopur dhe cilët janë sektorët bosh;
të krijohet një sistem pikëzimi për dhënien e lejeve, ku avantazhohen shërbime të reja, inovative dhe të domosdoshme;
të rritet bashkëpunimi me dhomat e tregtisë dhe sipërmarrësit për të orientuar më mirë investimet.
Korça nuk mund të ecë përpara me një zhvillim të çrregullt dhe pa busull. Duhet të dalë nga mentaliteti i “hap një hotel se po ecën turizmi” dhe të kalojë në një fazë më të pjekur ku zhvillimi është i balancuar dhe afatgjatë. Sepse përndryshe, do të kemi shumë ndërtesa bosh, shumë dyer të mbyllura dhe shumë sipërmarrës të zhgënjyer.
