Në një kohë kur Shqipëria jonë, sidomos në sezonin veror përballet me vështirësinë e madhe të pastrimit të mbetjeve dhe përpunimit të tyre, kjo sa nga një komunitet ende i pa sensibilizuar mbi mënyrëb e hedhjes së mbetjeve e sa nga institucione vendore që dorëzohen para sasive të mëdha të mbetjeve pa mundur të menaxhojnë situatat, në fakt ka edhe raste suksesi nga të cilat duhet të mësosh.
Tashmë prej disa vitesh në Maliq është ngritur një landfill i cili menaxhon dhe përpunon mbetjet e të gjitha bashkive të qarkut, e ndërsa në qytete të tjera përballen me fusha të paligjshme pirgjesh plehrash, në fakt bashkitë e juglindjes renditen ndër më të pastrat në rang vendi.
Smoget e tymit kanë mbuluar vazhdimisht Vlorën, Elbasanin që janë pjesë e qarqeve me buxhete shumë herë më të mëdha se Korça, por në fakt gjithçka ka të bëjë me nikoqirllëkun e menaxhimit dhe edhe këtë herë juglindja përmes landfillit të Maliqit jep mësime se si duhen pastruar dhe menaxhuar mbetjet.
A ka punë më shumë për tu bërë? Patjetër! Por deri më tani puna e bërë shihet me vepra, landfilli i Maliqit nuk ka shkaktuar më të voglën ndotje, nuk ka marrë zjarr asnjëherë e aq më tepër ja ka dalë që të përpunojë më së miri mbetjet e 6 bashkive të juglindjes.
Jo vetëm kaq, por vazhdimisht nga ana e administratës realizohen aktivitete sensibilizuese, kryesisht me fëmijë, me të cilët punohet për ti ndërgjegjësuar mbi mbrojtjen e natyrës dhe mjedisit.
Landfilli i Maliqit përfaqëson një histori suksesi për menaxhimin modern të mbetjeve në Shqipëri, duke sjellë standarde europiane në ruajtjen e mjedisit dhe mbrojtjen e shëndetit publik. Investimi i realizuar dhe funksionimi efikas i këtij landfilli janë një shembull i qartë se si mund të ndërtohen zgjidhje të qëndrueshme për sfidat mjedisore në vend.
