Aeroporti i Rinasit ka nxjerrë një njoftim të rëndësishëm për pasagjerët, duke i paralajmëruar për vonesa apo anulime fluturimesh për shkak të një greve të punonjësve të Kontrollit të Trafikut Ajror në FRancë.
“Të nderuar pasagjerë të TIA-s, është njoftuar një grevë nga Kontrolli i Trafikut Ajror (ATC) në Francë për datat 3 dhe 4 Korrik 2025, e cila mund të ndikojë në operimet e fluturimeve dhe të shkaktojë vonesa apo anulime të mundshme. Për më shumë informacion, ju lutemi kontrolloni faqen zyrtare të linjës ajrore përkatëse dhe email-in/mesazhet tuaja SMS”, thuhet në njoftim.
Sipas sindikatës së punonjësve, greva po zhvillohet për shkak të mungesës së stafit dhe menaxhimit të keq. Sidomos të premten situata në Francë ka qenë më kaotike, pasi ishte dita e fundit e shkollës dhe shumë familje po nisnin pushimet. Mbi 1000 fluturime janë anuluar atje, ndërsa autoritetet franceze e kanë quajtur vendimin të papranueshëm.
