Vendimi i Bashkisë së Korçës për të mbyllur për qarkullimin rrugor Bulevardin “Republika” çdo mbrëmje nga ora 19:00 deri në mesnatë ka ngjallur reagime të forta nga ana e bizneseve të zonës, të cilat e konsiderojnë vendimin të njëanshëm dhe të dëmshëm për aktivitetin e tyre ekonomik.
Përfaqësues të disa prej bizneseve që operojnë përgjatë bulevardit kanë nisur mbledhjen e firmave për një peticion drejtuar bashkisë, ku kërkojnë rishikimin e vendimit. Sipas tyre, jo vetëm që nuk janë konsultuar më parë, por nuk janë njoftuar as zyrtarisht për vendimin që, sipas tyre, sjell ulje të ndjeshme të klientelës pas orarit të mbylljes.
Një ndër zërat kritikë ndaj kësaj nisme ka qenë edhe këshilltari i Këshillit Bashkiak, Klajdi Pllaha, i cili në një reagim në rrjetet sociale shkruan:
> “Mund të ketë dyer pa çelës, por nuk ka asnjë çelës pa derë… Ka një çelës që zgjidh shumë probleme në qytetin tonë: kuvendo me qytetarët! Për mbylljen e trafikut në bulevardin Republika, u pyetën qytetarët apo bizneset e zonës? Mbase një pjesë e madhe mund të jetë dakord, por ti si bashki, pyeti qytetarët. Nuk mund të pretendosh se ke të vërtetën absolute.”
Deri në momentin e publikimit të këtij lajmi, Bashkia e Korçës nuk ka dalë me një deklaratë zyrtare për të sqaruar arsyet dhe objektivat e këtij vendimi, duke lënë hapësirë për më shumë paqartësi dhe debat publik.
Vendimi për mbylljen e bulevardit, megjithëse mund të synojë kthimin e hapësirës urbane në një zonë të lirë për qytetarët dhe turistët gjatë mbrëmjeve të verës, duket se ka nevojë për më shumë dialog dhe transparencë, për të gjetur një balancë midis interesit publik dhe atij të bizneseve lokale.
