Ekipi i volejbollit për femra Skënderbeu ka nisur me ambicie përgatitjet për sezonin e ri, duke synuar përforcime cilësore në përbërje, pavarësisht sfidave që e kanë shoqëruar në këtë fazë tranzicioni.
Sipas trajnerit Olsi Haxhillari, klubi është në kërkim të lojtareve shqiptare që aktivizohen si në kampionatin vendas, ashtu edhe në kampionatet e huaja.
“Jo vetëm që kemi komunikuar me disa lojtare te njohura shqiptare, por me dy prej tyre jemi thuajse në fazën përfundimtare të marrëveshjes,” – u shpreh Haxhillari, duke konfirmuar kontaktet e vazhdueshme me elementë të spikatur të volejbollit shqiptar.
Megjithëse nga skuadra janë larguar 7 lojtare titullare dhe te stolit, trajneri Haxhillari mbetet optimist dhe thekson se Skënderbeu do të vijojë të mbetet mes skuadrave kryesore në garën e këtij sezoni.
“Është e vërtetë që jemi përballë një ndërrimi të madh te ekipit, por kjo nuk do të thotë që do të ulim objektivat. Perkundrazi Skënderbeu do të jetë aty ku i takon në krye të renditjes,” – u shpreh tekniku korçar.
Me një strategji të qartë për të ruajtur identitetin dhe konkurrueshmërinë, Skënderbeu kërkon të ndërtojë një skuadër të re të bazuar në cilësi dhe dëshirë për sukses, duke investuar te emra premtues vendas dhe te huaj që mund t’i japin freski projektit afatgjatë të klubit.
Skenderbeu eshte historia e volejbollit shqiptar, ka mbyllur Haxhillari.
