Edi Rama harron premtimin për Marin Memën
Gjatë një vizite në Selanik më 3 nëntor 2024, kryeministri Edi Rama premtoi publikisht se do të dorëzonte një notë proteste për gazetarin Marin Mema, i cili ishte shpallur person non grata nga autoritetet greke. Rama u shpreh se do të merrej personalisht me këtë çështje, duke e cilësuar vendimin e Greqisë si absurd dhe të pajustifikuar.
Megjithatë, nga burime të sigurta pranë ambasadës shqiptare në Athinë mësohet se deri më sot nuk është ndërmarrë asnjë veprim zyrtar. Në ambasadë nuk ka mbërritur asnjë dokument apo kërkesë nga Ministria e Jashtme apo zyra e Kryeministrit që lidhet me rastin Mema.
Pavarësisht deklaratës së fortë dhe pritshmërive që krijoi ajo, veprimet konkrete kanë munguar. Marin Mema vijon të jetë i ndaluar të hyjë në Greqi, ndërsa qeveria shqiptare duket se ka zgjedhur të heshtë.
Ky premtim i pambajtur i shtohet listës së angazhimeve publike që mbeten vetëm fjalë, sidomos kur bëhen në prag të zgjedhjeve apo takimeve me diasporën.
