Korça ka hapur zyrtarisht sezonin turistik me një aktivitet të veçantë, ku morën pjesë agjencitë më aktive turistike nga e gjithë Shqipëria. Takimi shërbeu si një mundësi për të ndarë ofertat dhe pasuritë që qyteti juglindor ofron gjatë kësaj vere, duke e promovuar si një nga destinacionet më të preferuara për turistët vendas dhe të huaj.
Në fokus të prezantimit ishin bukuritë natyrore të rajonit, trashëgimia kulturore, gastronomia tradicionale dhe një kalendar i pasur aktivitetesh artistike dhe festive që do të shoqërojë sezonin veror.
Moment i veçantë i aktivitetit ishte prezantimi i albumit fotografik “Korça – The Heartland”, realizuar nga fotografi i njohur Albert Cmeta. Ky album, fryt i një pune 12-vjeçare, pasqyron me ndjeshmëri dhe elegancë peizazhet, traditat dhe historinë e Korçës, duke e kthyer në një dëshmi artistike të vlerave të saj të rralla.
Korça është gati të mirëpresë vizitorët në një verë që pritet të jetë e jashtëzakonshme, duke ofruar një përvojë të pasur dhe autentike për të gjithë.
