Aktori dhe producenti i njohur, Elvis Pupa, ka reaguar publikisht pas disa lajmeve të shpërndara në media, të cilat pretendojnë për një përfshirje të tij në një çështje të trafikut të drogës në Australi dhe se ndodhet “në arrati”.
Pupa i ka cilësuar këto pretendime si të pavërteta dhe keqdashëse, duke theksuar se prej më shumë se një muaji ndodhet në Tiranë, ku është i angazhuar me projekte të rregullta profesionale, brenda dhe jashtë Shqipërisë.
“Çdo përpjekje për ta paraqitur këtë situatë ndryshe është një manipulim i pastër i informacionit, një keqinterpretim i qëllimshëm që synon të bëjë lajm aty ku nuk ka asgjë të jashtëzakonshme,” shkruan Pupa në deklaratën e publikuar në rrjetet sociale.
Ai ka sqaruar edhe situatën e bashkëshortes së tij, Belina Pupa, duke thënë se ajo është plotësisht e lirë dhe vijon aktivitetin e saj profesional. Çështja në fjalë, sipas tij, është pjesë e një procesi ligjor në zhvillim, dhe vendimin përfundimtar e jep drejtësia.
“Fatkeqësisht kemi parë një keqpërdorim të rëndë të lajmit, me qëllim sensacionalizmi dhe klikimesh,” shkruan ndër të tjera Pupa, duke dënuar ashpër spekulimet mediatike.
Në fund të reagimit, ai falënderon ndjekësit për mbështetjen dhe bën thirrje për qetësi dhe respekt ndaj të vërtetës, duke shtuar se jeta e tij dhe e familjes vazhdon normalisht.
Reagimi i plotë i Elvis Pupës;
Të dashur miq, ndjekës dhe bashkëpunëtorë,
Jam i detyruar të reagoj pas disa lajmeve të pavërteta dhe keqdashëse që po qarkullojnë në media, sipas të cilave unë gjoja “jam arratisur” dhe “ndodhem në kërkim”. Dua ta bëj shumë të qartë: prej më shumë se një muaji ndodhem në Tiranë, ku po zhvilloj angazhime të rregullta profesionale, të planifikuara në Shqipëri dhe më gjerë në Europë.
Çdo përpjekje për ta paraqitur këtë situatë ndryshe është një manipulim i pastër i informacionit, një keqinterpretim i qëllimshëm që synon të bëjë lajm aty ku nuk ka asgjë të jashtëzakonshme.
Sa i përket bashkëshortes sime, Belina, ajo vazhdon aktivitetin e saj profesional dhe është plotësisht e lirë. E gjithë situata që po trajtohet aktualisht është pjesë e një procesi ligjor që është ende në zhvillim, dhe siç është shprehur edhe ajo vetë, i takon drejtësisë të flasë e fundit.
Fatkeqësisht, kemi parë një keqpërdorim të rëndë të lajmit, me qëllim sensacionalizmi dhe klikimesh, ku deformimi ka marrë vendin e të vërtetës. Jetët tona janë publike, por kjo nuk i jep askujt të drejtën të abuzojë me dinjitetin e njerëzve.
Jeta vazhdon normalisht, me punën dhe përgjegjësitë tona të përditshme. Ne do të përballojmë çdo situatë me qetësi, transparencë dhe respekt për të vërtetën.
Faleminderit për mirëkuptimin dhe mbështetjen që shumë prej jush na kanë treguar.
Me respekt,
Elvis Pupa
