Pas më shumë se tri dekadash në politikën aktive, Edmond Spaho ka shpallur largimin e tij nga Parlamenti, duke theksuar se zgjedhjet e 11 majit ishin të fundit në karrierën e tij parlamentare. Në një mesazh publik, ai u shpreh i shokuar nga rezultati i këtyre zgjedhjeve dhe falenderoi të gjithë ata që e kanë mbështetur ndër vite.
“Jam i shokuar me rezultatin e zgjedhjeve të 11 Majit! Këto zgjedhje ishin të fundit të karrierës sime aktive në Parlament,” shkruan Spaho.
Ai ka shprehur mirënjohje të thellë për familjen e tij, e cila sipas tij ka bërë sakrifica të mëdha për t’i mundësuar ndjekjen e pasionit në politikë, si dhe për strukturat e Partisë Demokratike në Maliq dhe Qarkun e Korçës.
“Pa ata nuk do kisha arritur asgjë në politikë,” thekson Spaho, duke falenderuar veçanërisht qytetarët që i kanë besuar për 35 vite me radhë.
Në mesazhin e tij, Spaho nuk lë pa përmendur edhe situatën aktuale të Partisë Demokratike, të cilës i uron të gjejë forcën për të kaluar krizën dhe të rikthehet si shpresë për shqiptarët.
Largimi i tij shënon fundin e një epoke për një prej figurave më të njohura të PD-së, që ka qenë aktiv në politikën shqiptare që prej fillimit të pluralizmit.
