Kryeministri Edi Rama dhe homologu i tij i Maqedonisë së Veriut, Hristijan Mickoski, u takuan sot në pikën kufitare të Qafë Thanës, ku u prezantua sistemi i kontrollit të përbashkët mes dy vendeve.
Mickoski e cilësoi një hap të rëndësishëm për lehtësimin e lëvizjes së qytetarëve, ndërsa paralajmëroi se bashkëpunimi do të shtrihet edhe në pika të tjera kufitare.
Rama e përmblodhi ndryshimin me një shprehje:
“Deri tani në këtë doganë ishim kontrollo, kontrollo. Tani jemi beso, kontrollo. Hapi tjetër është beso, beso, që të mos kemi më asnjë kontroll këtu, në rrugëtimin e përbashkët në BE.”
Kryeministri shqiptar tha se sistemi i ri do t’u shërbejë miliona njerëzve që kalojnë kufirin dhe theksoi rëndësinë e avancimit të Korridorit 8, që lidh Shqipërinë me Maqedoninë e Veriut dhe Bullgarinë.
Mickoski pyetet për himnin shqiptar në Pustec
Gjatë konferencës, Mickoski u pyet nëse duhet t’u kërkojë falje shqiptarëve për incidentin në Pustec, ku u ngritën pikëpyetje për mosrespektimin e himnit shqiptar.
Kryeministri maqedonas u përgjigj se himni ishte ekzekutuar dhe se aktiviteti duhej ndjekur deri në fund.
“Ne jemi popull shumëetnik dhe i vlerësojmë të gjithë. Sot po festojmë 22 Nëntorin. Në lidhje me himnin, nuk e keni ndjekur aktivitetin deri në fund. Himni u zbatua. Të relaksohemi”, tha Mickoski.
Rama: Nuk i tregojmë Maqedonisë çfarë të bëjë
Rama u pyet edhe për deklaratat e tij lidhur me përfshirjen e bullgarëve në Kushtetutën e Maqedonisë së Veriut.
Ai tha se Shqipëria nuk do të ndërhyjë në vendimmarrjen e Shkupit, ndërsa theksoi mbështetjen e tij për integrimin e vendit në BE.
“Unë kam qenë në mënyrë të vijueshme një zë, nganjëherë i lartë, në mbështetje të procesit të afrimit dhe anëtarësimit të Maqedonisë së Veriut në BE. Asnjëherë nuk do t’ia lejoja vetes që t’i tregoja qeverisë apo popullit maqedonas se çfarë duhet të bëjë”, tha Rama.
Mickoski, nga ana e tij, deklaroi se marrëdhënia me Ramën është e mirë dhe se disa deklarata janë nxjerrë nga konteksti.
“Çdo gjë ndërtohet me besim. Një projekt i tillë është Korridori 8, që lidh Bullgarinë, Maqedoninë dhe Shqipërinë”, tha ai.
Përplasje me gazetarin nga Tetova
Një moment më i tensionuar ishte pyetja e një gazetari nga Tetova, i cili akuzoi Ramën se nuk ka folur për shqiptarët e Maqedonisë së Veriut.
Rama iu përgjigj se Maqedonia e Veriut është shtet sovran dhe se shqiptarët kanë partitë e tyre politike për t’u përfaqësuar.
“Ju as më keni parë e as do të më shikoni të bëj fushatë për ndonjë parti politike në Maqedoninë e Veriut”, tha Rama.
Ai shtoi se nuk duhet të kapërcehet kufiri i ndërhyrjes në çështjet e brendshme të një shteti tjetër.
Në fund, Rama ironizoi edhe situatën e konferencës, duke thënë për përkthyesen:
“Kam edhe një ankesë për Hristijanin. Përkthyesen më të mirë e mbajti për vete.”
Takimi në Qafë Thanë u zhvillua në kuadër të forcimit të bashkëpunimit mes Shqipërisë dhe Maqedonisë së Veriut, ndërsa të dy kryeministrat vunë theksin te lehtësimi i lëvizjes në kufi dhe avancimi i Korridorit 8.


