Institucionet në juglindje të vendit kanë nisur përgatitjet për sezonin dimëror, me qëllim përballimin e reshjeve të dëborës, ngricave dhe problematikave që mund të krijohen në qarkullimin rrugor, veçanërisht në zonat malore.
Prefektja e Korçës, Florinda Zegullaj, bën me dije se janë kryer inspektime në terren për të verifikuar gatishmërinë e mjeteve borëpastruese, fadromave, si dhe rezervave të kripës dhe skorjes.
Vëmendje e veçantë i është kushtuar aksit Qafë Thanë, i cili shtrihet në territorin e dy prefekturave, Korçë dhe Elbasan. Për këtë arsye, është ngritur një mekanizëm i përbashkët koordinimi për të garantuar ndërhyrje të shpejtë në rast të përkeqësimit të kushteve atmosferike.
Paralelisht, masa janë marrë edhe për garantimin e shërbimit shëndetësor në zonat e thella. Njësia Vendore e Kujdesit Shëndetësor ka siguruar furnizimin me medikamente, ndërsa për familjet që jetojnë në zona me vështirësi në akses do të ofrohet edhe shërbim mjekësor në banesë.
Për përballimin e sezonit dimëror janë vënë në dispozicion 30 mjete borëpastruese, të cilat do të angazhohen në akset kryesore të juglindjes, si Kapshticë–Qafë Thanë, Korçë–Tri Urat, Korçë–Voskopojë, Korçë–Dardhë dhe Zëmblak–Goricë e Madhe.
Përgatitjet synojnë garantimin e qarkullimit rrugor dhe shmangien e izolimit të komuniteteve, veçanërisht në zonat malore që gjatë muajve të dimrit përballen më shpesh me vështirësi për shkak të reshjeve të dëborës dhe ngricave.


