Komisioni i Mbrojtjes Civile të Qarkut Korçë u mblodh këtë të hënë, në një takim ku morën pjesë drejtues të institucioneve përgjegjëse dhe kreu i Agjencisë Kombëtare të Mbrojtjes Civile, Haki Çako.
Në fokus të diskutimeve ishin problematikat dhe rreziqet me të cilat përballen bashkitë e qarkut, si dhe nevoja për mbështetje financiare dhe shtim të kapaciteteve për përballimin e situatave emergjente.
Kryebashkiaku i Pogradecit, Ilir Xhakolli, kërkoi financim për rehabilitimin e tre lumenjve të qytetit, duke theksuar se ndërhyrjet janë të domosdoshme për të shmangur përkeqësimin e situatës, veçanërisht gjatë periudhave me reshje intensive. Sipas tij, bashkia ka kryer pastrime me fondet e veta, por nuk ka mundësi financiare për të përballuar koston e plotë të projektit të rehabilitimit.
Një tjetër problematikë që kërkon ndërhyrje nga qeveria qendrore është rehabilitimi i sistemit të bonifikimit në fushën e Maliqit. Prefektja e Qarkut Korçë, Florinda Zegullaj, bëri me dije se në projektbuxhetin e Ministrisë së Bujqësisë është parashikuar financimi i plotë i këtij projekti, me qëllim zgjidhjen e problemeve të përsëritura me sipërfaqet bujqësore.
Ndërkohë, kreu i Agjencisë Kombëtare të Mbrojtjes Civile, Haki Çako, sqaroi mënyrën e funksionimit të sistemit të reagimit ndaj emergjencave. Sipas tij, fillimisht aktivizohen kapacitetet e pushtetit vendor dhe, në rast se ato shterojnë, angazhohen strukturat në nivel qarku e më pas ato kombëtare.
Kërkesat e bashkive të Pogradecit dhe Maliqit nxjerrin në pah nevojën për investime dhe mbështetje financiare nga niveli qendror, pasi problematikat e evidentuara tejkalojnë mundësitë buxhetore të pushtetit vendor.


