Korça po shkon drejt prenotimit të plotë të kapaciteteve akomoduese për festat e nëntorit, ndërsa në Pogradec situata paraqitet ndryshe, me kërkesa dhe prenotime të pakta nga vizitorët.
Interesi për të kaluar festat e nëntorit në qytetin e Korçës ka qenë i lartë. Sipas operatorëve turistikë, prenotimet kanë nisur që në muajin shtator dhe aktualisht shumë struktura akomoduese janë drejt plotësimit të vendeve të lira.
Ndërkohë, në qytetin e Pogradecit, kërkesa për akomodim gjatë kësaj periudhe mbetet e ulët. Sipas operatorëve turistikë, deri më tani prenotimet për festat e nëntorit kanë qenë të pakta, duke reflektuar një interes më të kufizuar të vizitorëve për të zgjedhur qytetin liqenor si destinacion për këto ditë pushimi.
Përveç festave të nëntorit, Korça ka nisur të presë prenotimet edhe për periudhën e Krishtlindjeve dhe Vitit të Ri. Sipas operatorëve, kërkesa për këto festa është gjithashtu e lartë dhe prenotimet po shkojnë drejt plotësimit të kapaciteteve. Krahas qytetit, interes të veçantë vijojnë të kenë edhe destinacione turistike si Voskopoja dhe Dardha.
Korça, Voskopoja dhe Dardha mbeten ndër destinacionet më të preferuara të juglindjes gjatë sezonit të festave, duke tërhequr turistë nga Shqipëria dhe vendet e rajonit. Për shkak të kërkesës së lartë, prenotimet në këto zona nisin disa javë përpara, ndërsa në disa raste kapacitetet akomoduese plotësohen deri në një muaj para festave.


