Reforma e re territoriale e Partisë Socialiste rrezikon të mos kalojë në Kuvend, pasi brenda vetë grupit parlamentar socialist janë shfaqur kundërshtime ndaj draftit që parashikon uljen e numrit të bashkive nga 61 në 46.
BufiUrtë.al mëson se gjatë mbledhjes së grupit parlamentar të PS-së, të zhvilluar në fillim të kësaj jave, deputetët Erion Braçe dhe Vullnet Sinaj kanë shprehur rezerva për shkrirjen e 15 bashkive.
Në fund të mbledhjes, drafti është hedhur në votim brenda grupit parlamentar dhe, sipas burimeve, Braçe dhe Sinaj kanë votuar kundër.
“Më bën të shkoj drejt votës kundër”, mësohet të jetë shprehur Erion Braçe gjatë diskutimit.
Kundërshtimi i dy deputetëve socialistë merr rëndësi për shkak të numrit të votave që nevojiten për miratimin e reformës. Për ndryshimin e hartës territoriale duhen 84 vota në Kuvend.
Nëse Braçe dhe Sinaj ruajnë të njëjtin qëndrim edhe në seancën plenare, mazhoranca nuk i ka automatikisht votat e mjaftueshme për të kaluar draftin.
Kjo e vendos reformën territoriale përballë një pikëpyetjeje të madhe: a do të arrijë PS të sigurojë 84 votat, apo drafti për 46 bashki do të dështojë në Kuvend?
Por kundërshtimi i dy deputetëve ngre edhe një tjetër pikëpyetje politike. A është PS e vendosur realisht ta çojë deri në fund këtë reformë, apo beteja brenda grupit parlamentar është pjesë e një strategjie për të krijuar hapësirë për ndryshimin ose tërheqjen e draftit?
Nëse nuk sigurohen votat e nevojshme, reforma e shumëdiskutuar territoriale mund të mos miratohet në formën e propozuar nga socialistët.
46 bashki në letër, por 84 vota që mungojnë në Kuvend. Tashmë gjithçka varet nga vota e deputetëve.
