Për të dytën herë, banorët e fshatit Burimas në Maliq kanë kundërshtuar ndërhyrjen për marrjen e ujit nga burimi i fshatit.
Banorët kanë protestuar dhe kanë penguar makineritë e Ujësjellës-Kanalizimeve Korçë të hyjnë në fshat për nisjen e punimeve. Ata shprehen kundër projektit, pasi sipas tyre marrja e ujit nga burimi mund të ndikojë në furnizimin me ujë të vetë banorëve të Burimasit.
Uji parashikohet të përdoret në kuadër të një projekti rajonal për furnizimin me ujë të fshatrave të tjera të zonës.
Gjatë protestës ka pasur edhe përplasje mes banorëve dhe policisë, ndërsa banorët kanë qëndruar përpara mjeteve të punës duke penguar vijimin e ndërhyrjes.
Nga ana tjetër, përfaqësues të Ujësjellës-Kanalizimeve Korçë deklarojnë se projekti nuk do të dëmtojë furnizimin me ujë të Burimasit. Sipas tyre, bëhet fjalë për një projekt rajonal dhe ndërhyrja në Burimas është pjesë e tij.
Për shkak të kundërshtimit të banorëve, makineritë nuk kanë mundur të nisin punimet. Për të dytën herë, Ujësjellës-Kanalizimet Korçë janë tërhequr nga fshati, ndërsa punimet mbeten të bllokuara dhe palët vijojnë të kenë qëndrime të kundërta për zbatimin e projektit.
