Është shtyrë seanca e parë e gjykimit paraprak për pesë personat e akuzuar në lidhje me vdekjen e Egli Progës në Pogradec.
Seanca e zhvilluar këtë të hënë zgjati rreth 60 minuta, por gjykata nuk mundi të marrë vendim për shkak të mungesës së avokatit të Leonidha Guçes, një prej të akuzuarve.
Seanca e radhës pritet të zhvillohet të hënën e ardhshme. Gjykata do të vendosë nëse çështja do të kalojë për gjykim në themel apo do t’i kthehet Prokurorisë për plotësim të hetimeve.
Pas rreth dy vitesh hetime, Prokuroria e ka dërguar çështjen për gjykim ndaj pesë personave. Dy prej tyre ndodhen nën masën e sigurisë “arrest në shtëpi”, ndërsa tre të tjerët janë nën masën “detyrim paraqitje”, të akuzuar për moskallëzim krimi.
Vdekja e Egli Progës në Pogradec shkaktoi reagime të forta publike dhe debate lidhur me mënyrën e trajtimit dhe hetimit të ngjarjes.
