Një operacion i koduar “Borders 2” është finalizuar nga strukturat e Drejtorisë Vendore për Kufirin dhe Migracionin Korçë, duke goditur një rast të dyshuar të dhënies së ndihmës për kalim të paligjshëm të kufirit kundrejt fitimit.
Në kuadër të operacionit është arrestuar në flagrancë Klodjan Pashaj, 32 vjeç, banues në Peqin, ndërsa është shpallur në kërkim një 41-vjeçar, i dyshuar si bashkëpunëtor.
Sipas Policisë, 32-vjeçari u kap në fshatin Drenovë, teksa transportonte me automjet në drejtim të Tiranës 7 shtetas të huaj, 2 nga Bangladeshi dhe 5 nga Somalia. Sipas hetimeve paraprake, ata kishin hyrë ilegalisht në Shqipëri përmes Kapshticës dhe synonin të kalonin ilegalisht drejt Malit të Zi.
Policia bën me dije se 41-vjeçari, i cili dyshohet se kontrollonte rrugën, nuk iu bind urdhrit për të ndaluar dhe u largua me automjet. Pas disa orësh kërkimi, automjeti u gjet dhe u sekuestrua në cilësinë e provës materiale.
Në kuadër të operacionit janë sekuestruar 2 automjete, një aparat celular dhe një shumë parash.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, ndërsa vijon puna për dokumentimin e plotë të veprimtarisë së dyshuar kriminale dhe kapjen e personit të shpallur në kërkim
