Vidohva e Devollit/ fshati i 45 fiseve dhe ujit më të mirë në botë
shkruan Kosta Nake:
Korçë, Vidohova, ose siç e shqiptojnë disa “Vidovë”, është një nga fshatrat më interesantë të Devollit, i njohur për historinë, pasurinë natyrore dhe trashëgiminë e tij shoqërore. Ky vendbanim i vogël mbart një numër rekord fisesh, plot 45, duke u renditur si “kampioni” i Prefekturës së Korçës për diversitetin familjar.
Uji i famshëm i Vidohovës
Sipas studiuesit Shaban Merolli, Vidohova ka ujin më të mirë të pijshëm në botë. Çezma e Seidift në mëhallën Adrovë njihet për cilësinë e jashtëzakonshme të ujit, i cili u analizua edhe nga ushtarët italianë gjatë luftës italo-greke. Një tjetër burim i rëndësishëm është lumi i Kërlishtit, që buron matanë kufirit, furnizon ujëmbledhësin dhe derdhet në ujëvarë.
Ujëvara e harruar
Në këtë fshat ndodhet edhe një pasuri natyrore e veçantë ujëvara e Vidohovës. Ajo është më e lartë se ujëvara e Sinicës, por ka prurje më të vogla. Mjedisi shkëmbor dhe terreni i thyer krijojnë mundësi të mëdha për zhvillimin e turizmit natyror, por deri më sot ka mbetur jashtë vëmendjes.
Një fshat me histori të veçantë
Vidëhova ndahet në tri mëhalla: të shkollës, të xhamisë dhe të mesit, ndërsa lidhjet mes tyre realizohen përmes rrugëve të brendshme dhe shtegut këmbësor. Fshati ka patur në të kaluarën tri kulla tipike të Shqipërisë së Mesme, por fatkeqësisht sot nuk ka mbetur asnjë gjurmë prej tyre.
Besimi dhe ndryshimet shoqërore
Deri në fund të viteve ’80, banorët e Vidëhovës ishin të gjithë të besimit islam. Pas viteve ’90, me ardhjen e nuseve nga veriu i vendit, këtu është ngritur edhe një kishë katolike për të respektuar besimin e tyre.
Fiset e fshatit
Fshati është i veçantë edhe për nga numri i fiseve që përfaqëson: Asllani, Bana, Bejolli, Biledhi, Braholli, Bylykbashi, Cenolli, Çuka, Ganolli, Hoxha, Hoxhalli, Hysenlli, Hysi, Kadiu, Kaso, Kollovozi, Kroi, Kyçyku, Lamçe, Liçi, Mançelli, Medolli, Mengolli, Meraja, Merolli, Mici, Mulla, Mulliri, Mustabelli, Nexhipi, Nuholli, Pepini, Qazolli, Sokaku, Sulejmani, Shaka, Shaqlli, Shyti, Topi, Xhihani, Xhufkolli, Xhuka, Zenuni, Zyka, disa prej tyre tashmë të shpërngulura në qytete të tjera të Shqipërisë apo jashtë vendit.
Bufiurte.al
