Tre emigrantë me shtetësi egjiptiane janë filmuar nga gazetari i Euronews Albania, Xhensil Shkëmbi, teksa ecin në këmbë përgjatë rrugës së Dardhës, duke rrëfyer kalvarin e tyre të vështirë gjatë përpjekjes për të kaluar drejt Italisë, pasi kishin ardhur nga Greqia.
Sipas dëshmisë së tyre, emigrantët kanë qëndruar për tre ditë rresht në mal, në kushte ekstreme, mbi borë, pa ushqim, pa ujë, pa rroba rezervë dhe pa asnjë mjet për t’u mbrojtur nga i ftohti. Ata tregojnë se kanë lëvizur vetëm në këmbë, duke rrezikuar seriozisht jetën.
“Jam egjiptian, vij nga Greqia dhe dua të shkoj në Itali. Për Zotin, për tre ditë nuk kishim asgjë me vete: as ushqim, as ujë, as batanije. Vetëm ecje dhe të ftohtë. Nuk gjenim dot rrugën për shkak të dëborës. Sot dolëm nga mali, por kemi frikë se mos na kap policia. Vetëm ju na dhatë pak bukë dhe cigare. Nuk hynim dot në restorante, kemi frikë se na arrestojnë.”
Emigrantët pretendojnë se kanë përjetuar dhunë nga policia shqiptare, duke u rrahur dhe kthyer disa herë pas, pavarësisht përpjekjeve të vazhdueshme për të kaluar kufirin. Ata bëjnë thirrje që të mos ushtrohet dhunë ndaj tyre dhe të mos rikthehen në të njëjtat kushte çnjerëzore.
Sipas tyre, edhe policia greke ka ndaluar persona të tjerë të grupit, të cilët janë ndarë prej tyre.
“Na kanë rrahur disa herë, na kanë kthyer mbrapsht dhe ne vijmë përsëri. Nuk duam të na rrahë policia dhe as të na kthejë pas. Kjo është lutja jonë. Nuk duam të qëndrojmë në Shqipëri, duam të ikim në Itali. Disa nga shokët tanë kanë mbetur në Greqi, i kanë futur në burg. Ne po e provojmë sërish. Në Itali kemi familjet tona.”
Pamjet e filmuara në zonën e Dardhës hedhin dritë mbi dramën e emigrantëve ilegalë, të cilët përballen çdo ditë me rrezik, dhunë dhe kushte ekstreme gjatë rrugëve të emigrimit drejt Europës Perëndimore.
