Korçë 3 Dhjetor 2025
Në ambientet e Qendrës Rinore Korçë u zhvillua sot ekspozita “Dua, Mundem, Krijoj”, një aktivitet i organizuar me rastin e Ditës Ndërkombëtare të Personave me Aftësi Ndryshe. Ekspozita u realizua nga Qendra Ditore e Zhvillimit Korçë në bashkëpunim me Qendrën Rinore Korçë, duke sjellë në qendër të vëmendjes talentet dhe krijimtarinë e të rinjve e të rriturve me aftësi ndryshe.
Punimet artistike të ekspozuara u pritën me entuziazëm nga publiku, ndërsa institucionet e qytetit shprehën mbështetjen e tyre përmes blerjes së pikturave. Të ardhurat do t’i shërbejnë Qendrës Ditore për vazhdimësinë e shërbimeve dhe mbështetjes ndaj përfituesve.
Në aktivitet mori pjesë edhe Kryetari i Qarkut Korçë, z. Petrika Tollkuci, i cili vlerësoi punën e artistëve dhe rëndësinë e përfshirjes së tyre në jetën kulturore të qytetit, duke theksuar se Korça mbetet një shembull i respektit dhe mbështetjes për çdo talent.
Qendra Rinore Korçë falënderoi institucionet, partnerët dhe qytetarët për pjesëmarrjen dhe solidaritetin, duke nënvizuar se vetëm së bashku ndërtohet një komunitet më i ndjeshëm dhe më përfshirës.
