Një konflikt mes disa të rinjve është regjistruar mbrëmjen e sotme në Korçë, në lagjen nr. 2, pranë kinemasë së qytetit.
Sipas burimeve, të rinjtë janë përfshirë fillimisht në një debat verbal, i cili më pas ka degraduar në përplasje fizike. Ata dyshohet se janë goditur me grushte, ndërsa në konflikt mund të jenë përdorur edhe sende të forta.
Si pasojë e sherrit, një person ka mbetur i dëmtuar dhe është transportuar me urgjencë në spital. Burime mjekësore bëjnë me dije se ai ka pësuar dëmtime trupore, pasi dyshohet se gjatë përplasjes është goditur dhe më pas është rrëzuar në kangjella, duke marrë çarje në trup. Fatmirësisht, ai ndodhet jashtë rrezikut për jetën.
Menjëherë pas njoftimit, në vendngjarje kanë mbërritur forcat e policisë, por personat e përfshirë në konflikt janë larguar para mbërritjes së uniformave blu.
Grupi hetimor ka nisur punën për zbardhjen e plotë të rrethanave të ngjarjes. Po sekuestrohen pamjet e kamerave të sigurisë të bizneseve përreth dhe po merren në pyetje dëshmitarë që mund të kenë qenë të pranishëm në momentin e konfliktit.
Policia vijon hetimet, ndërsa priten detaje të tjera në vijim.
