Deri në 70 vizita në ditë janë regjistruar gjatë muajit janar në Spitalin e Pediatrisë në Korçë, si pasojë e shtimit të virozave të stinës, kryesisht gripit të tipit A.
Shefi i Shërbimit të Pediatrisë, mjeku Robert Rado, bën me dije se rastet kanë qenë të shumëllojshme, duke filluar nga forma të lehta e deri te raste me komplikacione serioze, të cilat kanë kërkuar trajtim spitalor
Sipas mjekut, gripi i tipit A shoqërohet me temperaturë të lartë dhe të zgjatur, çka e bën më të vështirë procesin e kurimit. Për këtë arsye, ai këshillon qytetarët të shmangin sa më shumë grumbullimet, me qëllim frenimin e përhapjes së virusit.
Mjekët rekomandojnë gjithashtu ndjekjen e një diete të shëndetshme, konsumimin e lëngjeve dhe çajrave, të cilat janë të domosdoshme për forcimin e organizmit, veçanërisht te fëmijët e prekur nga gripi.
