Drithas, Maliq — Deputetja e Korçës, Romina Kuko, ka inspektuar nga afër dëmet e shkaktuara nga reshjet e dendura në fushën e Maliqit, ku çarja e argjinaturës së lumit Devoll ka sjellë përmbytje të konsiderueshme në zonë.
“Jemi në fshatin Drithas ku shohim çarjen e argjinaturës në lumin Devoll. Është një nga herët e rralla që kjo ndodh, kishte dekada pa ndodhur. Ka përmbytur gjithë fushën e Maliqit. Aktualisht kemi 15 ura të dëmtuara dhe rreth 150 familje në qarkun e Korçës të prekura nga uji, përfshirë fatkeqësisht edhe viktimën në Progrit,” u shpreh Kuko.
Banorët e zonës kanë ngritur shqetësimin për mungesën e mbështetjes dhe dëmshpërblimeve, duke pyetur se ku ka qenë qeveria në ditët e vështira. Deputetja iu përgjigj:
“Përgjigjja ime është se nuk ka justifikim, por forca e natyrës nuk na lejon as këtë intervistë ta zhvillojmë normalisht. Imagjinoni furinë e reshjeve të paparashikueshme. Nuk ka plan që mund t’i parashikojë. Këtu kemi repartin e Korçës, policinë, ndërsa ushtria do të ndihmojë bashkinë në rikuperimin e argjinaturës. Kundër natyrës nuk luftohet, dhe ju e dini këtë.”
E pyetur nëse situata në juglindje është menaxhuar siç duhet nga institucionet, Kuko theksoi se të gjitha strukturat janë në terren:
“Ajo që mund të themi është se gjithë instancat janë në territor. Nuk është neglizhuar asnjë element me kapacitetet që kemi. Ushtria dhe emergjencat civile po punojnë në terren. Duhet kuptuar që është një situatë e vështirë.”
Autoritetet lokale dhe kombëtare vijojnë punën për rikuperimin e argjinaturave dhe normalizimin e infrastrukturës së dëmtuar.
