Pogradeci do të ketë së shpejti një pamje krejt tjetër buzë liqenit. Një projekt modern i quajtur “Pogradec Marina” do të nisë nga viti 2026, duke transformuar zonën bregliqenore në një hapësirë turistike të standardeve bashkëkohore.
Në pamjet e para të projektit arkitektonik, duken disa godina shumëkatëshe me dizajn organik, të rrethuara nga gjelbërimi dhe hapësira publike për këmbësorët.
Kompleksi do të ketë gjithashtu një port të ri për jahtet dhe mjetet lundruese, i ndërtuar me platforma të harkuara mbi ujë, që i japin zonës një identitet unik.
Një nga kullat më të mëdha në projekt dallon për pistën e helikopterëve në taracë, duke treguar synimin për të tërhequr turizëm elitar dhe investime të reja në qytet. Po ashtu, pjesë e projektit është edhe një pishinë e madhe pranë bregut, e rrethuar nga zona relaksi dhe shërbime turistike.
Synimi i “Pogradec Marina” është të sjellë zhvillim ekonomik, më shumë vizitorë dhe një standard të lartë shërbimesh për qytetin, pa i larguar vlerat natyrore që e bëjnë liqenin e Ohrit një pasuri të rrallë.
Ky projekt do të jetë një nga investimet më ambicioze në Pogradec, me pritshmëri të mëdha për transformimin urban dhe turistik të qytetit.
Aktualisht, hapësira ku do të ndërtohet marina karakterizohet nga godina të braktisura, struktura të amortizuara dhe mungesë funksionaliteti, duke u kthyer në një pikë problematike për qytetin dhe imazhin e tij turistik. Me realizimin e projektit, kjo zonë pritet të marrë jetë të re.
