Kujtime Braci është 53-vjeçari nga Pogradeci, i cili një vit më parë u përball me diagnozën e rëndë të kancerit. Një lajm që, siç rrëfen ai, e tronditi thellë jo vetëm atë, por edhe familjen e tij.
Sëmundja u zbulua rastësisht gjatë vizitave mjekësore në Tiranë. Kujtimi tregon se nuk kishte asnjë shenjë dhe nuk e besonte se vuante nga një sëmundje kaq e rëndë, deri në momentin kur mjekët ia komunikuan gjendjen djalit të tij.
Për të, periudha më e vështirë ishte fillimi i trajtimit, kur gjendja shëndetësore ishte e rënduar dhe nuk arrinte as të qëndronte në këmbë. Forcë dhe kurajo, thotë se i kanë dhënë mjekët që e kanë ndjekur gjatë gjithë këtij viti, të cilëve u është mirënjohës edhe sot.
Por përveç betejës shëndetësore, Kujtimi po përballet edhe me vështirësi të mëdha ekonomike. I pamundur për të punuar, me bashkëshorten po ashtu të papunë, ai është detyruar të marrë kredi për të përballuar shpenzimet e trajtimit, ndërsa çdo 21 ditë duhet të udhëtojë drejt Tiranës për kurim.
Megjithatë, pavarësisht dhimbjes dhe lodhjes, Kujtimi nuk e ka humbur shpresën. Në Ditën Ndërkombëtare të Kancerit, ai shprehet i bindur se do ta fitojë këtë betejë, falë mbështetjes së fëmijëve dhe familjes së tij, që i kanë qëndruar pranë në çdo hap.
Historia e Kujtimit është një dëshmi force, sakrifice dhe shprese për të gjithë ata që përballen çdo ditë me këtë sëmundje të rëndë.
