Mes tyre edhe shefi i Seksionit të Hetimit të Krimeve në Komisariatin e Devollit
Agjencia e Mbikëqyrjes Policore (Rajoni Elbasan–Korçë), në kuadër të operacionit të koduar “Last Bet”, ka ekzekutuar masa sigurie ndaj 6 punonjësve të Policisë së Shtetit dhe 1 shtetasi, të dyshuar për organizim dhe favorizim të veprimtarisë së paligjshme të basteve sportive.
Operacioni është zhvilluar nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Elbasan, në kuadër të një procedimi penal të regjistruar gjatë vitit 2025.
Sipas hetimeve, shtetasit Redon Tafilaku, Enea Kapllani, Denis Sinani, Aldi Molla, Gëzim Beqiraj dhe Ilir Tafa, duke shfrytëzuar atributet e funksionit dhe në bashkëpunim me njëri-tjetrin, dyshohet se kanë organizuar dhe favorizuar ushtrimin e llotarive të palejuara dhe basteve sportive, duke konsumuar elementët e veprave penale:
- “Organizimi ose ushtrimi i veprimtarisë së lojërave të fatit në kundërshtim me ligjin”
- “Shpërdorimi i detyrës”, parashikuar nga nenet 197/25 dhe 248 të Kodit Penal.
Për komisar Denis Sinani, me detyrë Shef i Seksionit për Hetimin e Krimeve në Volum në Komisariatin e Policisë Devoll, Gjykata ka caktuar masat e sigurimit personal me karakter ndalues:
- “Ndalim i daljes jashtë shtetit”
- “Detyrim për t’u paraqitur në policinë gjyqësore”
Masat janë dhënë në zbatim të neneve 233 dhe 234 të Kodit të Procedurës Penale.
Hetimet vijojnë për dokumentimin e plotë të kësaj veprimtarie të paligjshme dhe për identifikimin e personave të tjerë të përfshirë.
