Ndahet nga jeta në mënyrë të parakohshme studiuesi i njohur i historisë dhe kulturës arumune/vllahe, Gaqo Çyfeku. Ideatori dhe mëkëmbësi i medias së parë në Pogradec ARV që fuksionoi të paktën për 20 vite.
Me hidhërim të thellë është marrë lajmi për ndarjen nga jeta, në mënyrë të parakohshme dhe të padrejtë, të studiuesit të shquar të historisë dhe kulturës arumune/vllahe, Gaqo Çyfeku.
Një figurë e pazëvendësueshme, gjithmonë i pranishëm kudo në Shqipëri, Greqi, Maqedoni, Rumani, Bullgari, Gjermani, Francë, Gaqoja nuk kurseu asnjëherë përpjekjet e tij për të dhënë kontribut të vyer në mbrojtje të çështjes së komunitetit të arumunëve/vllahëve të Shqipërisë, për historinë, gjuhën dhe kulturën e tyre mijëravjeçare dhe autoktone në Ballkan.
Humbja e tij lë një boshllëk të madh. Sot kemi humbur një mik e shok të rrallë, romantik, këngëtar, paqedashës dhe bujar. Qyteti i Pogradecit humbi një qytetar të devotshëm dhe një intelektual të afirmuar. Familja humbi njeriun e shtrenjtë të shtëpisë. Zonja Lume humbi bashkëshortin e përkushtuar, ndërsa dy vajzat e tij, Viki dhe Viki, humbën babanë që përherë përgëzohej për mirëqenien dhe të ardhmen e tyre.
Sot, edhe Shoqata e Arumunëve të Shqipërisë humbi një ndër anëtarët më të dalluar dhe të përkushtuar.
Nuk ka fjalë të mjaftueshme për të shprehur dhimbjen dhe vlerësimin për mikun e dashur, ikonën e komunitetit, Gaqo Çyfeku. Në këtë moment të rëndë, shpreh ngushëllimet më të thella në emrin tim dhe të familjes sime për zonjën Lume dhe vajzat e tyre.
I paharruar qoftë kujtimi i njeriut zemërbardhë, Gaqo Çyfeku.
