Prokuroria e Korçës dërgon në gjyq mësuesin e artit për ngacmim seksual ndaj të miturave
Prokuroria pranë Gjykatës së Shkallës së Parë të Juridiksionit të Përgjithshëm Korçë ka përfunduar hetimet dhe ka dërguar për gjykim shtetasin B.D., i akuzuar për veprën penale “Ngacmim seksual” ndaj të miturve, parashikuar nga neni 108/a/2 i Kodit Penal.
Hetimet treguan se ngjarja ka ndodhur në nëntor 2024, kur prindërit e dy nxënëseve, me inicialet I.B. dhe A.K., denoncuan në polici mesazhe me përmbajtje seksuale të dërguara nga mësuesi përmes aplikacionit EhatsApp.
Vajzat deklaruan se komunikimet kishin karakter ngacmues, me kërkesa të papërshtatshme dhe cenim të dinjitetit të tyre.
Gjatë hetimeve, Prokuroria administroi prova të shumta: kontrollin e aparateve celulare, ekspertizën teknike të bisedave, si dhe dëshmitë e vajzave të dhëna në prani të psikologëve dhe përfaqësuesve ligjorë.
Raportet psikologjike treguan se ngjarja u ka shkaktuar të miturave gjendje të rëndë ankthi dhe stresi, duke imponuar nevojën për mbështetje terapeutike të specializuar.
Në përfundim, Prokuroria thekson se rasti përmbush të gjitha elementët e veprës penale “Ngacmim seksual” ndaj të miturve, një krim që ligji shqiptar e parashikon si vepër me rrezikshmëri të lartë shoqërore.
